論委任陳美齡做教育局長

最近風聞未來特首有意委任嫁咗去日本幾十年嘅金子太太陳美齡做未來政府嘅教育局長。好多人表示贊同，亦有好多人表示反對。贊同嘅意見係金子太太曾經在日本教過書，對教育嘅理論有深入的見解。同時佢兩位公子都係美國史丹福大學嘅高材生，學業有成，足證金子太太係一個既有理論基礎，亦有實際經驗嘅教育家。反對嘅意見主要認為佢係日本人，唔通香港冇人才，要請一個日本人嚟做香港政府嘅教育局長？怕且會俾人笑大個口。

我初時對陳美齡身為日本籍都有啲介懷，但係諗深一層，香港係中國按一國兩制管轄下嘅國際都市，官員中好多都曾經擁有過外國國籍，只要重申放棄外國籍，鄭重宣誓擁護中華人民共和國香港特別行政區以及基本法就冇問題啦。況且此舉足證中國已經真正崛起，令到天下歸心。就算曾經離國他去嘅都悟以往之不諫而浪子回頭。同時委任金子太太做教育局長仲有以下幾個好處:

• 回歸以來幾個教育局長都係男性，個個都唔係好掂，將香港嘅教育制度亂咁改，搞到一鑊泡。母語教學，國民教育等等都受到大部份香港市民反對而胎死腹中。依家小三TSA或者BCA又俾家長同社會人士轟到體無完膚。試下換一個當年香港好受歡迎嘅少女歌星嚟做，或者另有一番新氣象未定。
• 陳美齡嘅兩個公子學業有成得以進入國際知名嘅美國史丹福大學，佢可以同各位家長分享佢嘅教仔心得，令到香港本地嘅學生個個都可以入到外國嘅國際名校，唔使被迫接受香港嘅愛國教育，家長肯定額手稱慶。
• 咁就可以將香港大學嘅學位讓晒出來俾大陸嘅精英學生。冇咗本地學生係度搞搞震，可以乘機徹底剷除以前從大學孕育出嚟嘅港獨思想，將佢消滅於萌芽階段，為國家除一心腹之患。一舉兩得，何樂而不為？
• 日本政府見到香港政府咁睇得起Agnes Kaneko，都會覺得好光榮。或者會係釣魚島事件上願意做出多少讓步表示友好，等習總有個下台階，同日本冰釋前嫌，恢復中日友好，皆大歡喜。成為一段國際佳話，足以媲美四十幾年前嘅乒乓外交。

委任金子太太做教育局長有咁多好處，未來特首一於去馬啦！