特首候選人面面觀

明年年中香港特區首長曾蔭權任滿下台,邊個繼任做特首相信除咗胡總心中有數,冇人會知。原本可以好似大陸咁由國家最高領導人出聲欽點邊個邊個,就已經塵埃落定,和和諧諧咁換屆。但係咁樣就似乎太過平淡,太過冇癮。另一方面又怕俾外國傳媒借題發揮唱衰香港,話香港冇民主,違反基本法。所以就算已有定案,仍然要做番齣戲碼娛樂下港人,愚弄下西方各國。

首先由港澳辦王先生喺鑼鼓聲中打幾個筋斗出場唱兩句介紹劇情,提出特首候選人嘅基本條件。跟住男女主角、配角陸續出場。扮演女主角嘅係范夫人首先出場,跟住出場嘅男主角有鉤鼻英,唐唐。擔任配角嘅仲有因強推23條而罷官別號掃把頭嘅葉劉以及公民黨,民主黨推舉出來做過場嘅茄呢啡。

范夫人曾俾人問係唔係有心做特首候選人,起初支支吾吾,半推半就話未定,同時話唐唐同鉤鼻佬都各有不足之處,未可擔當重任。過咗冇耐,可能經過嚟自北方嘅高人指點,轉口話如果唐唐參選,佢就唔參加。並且大力推薦唐唐,認為佢最有資格擔任未來特首。范夫人前言不對後語,其中玄機,不言而喻。

疑似候選人中,以鉤鼻佬演出最積極,一早就透露佢當仁不讓的雄心壯志,有我不入地獄,誰入地獄的氣概。只是此君一副奸佞小人嘅形象已經深入民心,就算左派陣營亦不齒佢嗰種無孔不入嘅鑽營作風,大陸高層也心知肚明。雖然憐佢一片忠心赤膽,但都唔敢貿貿然撐佢去馬。當年老懵懂俾佢八萬五嘅理論跣到攤攤腰,搞到天怒人怨,最後面目無光腳痛下台收場,大家應該記憶猶新。所以我睇此君機會平平。

唐唐至今仍然未表態,一副吊兒郎當,坐定粒六咁姿態。唐唐除咗時時講錯嘢,政績乏善足陳外,冇做過啲令人極度反感嘅壞事。況且日日見佢紅光滿面,笑容可掬,好有當紅炸子雞嘅相貌。佢老竇同先前俾人誤傳去世嘅江總稱兄道弟,江總關照世侄升正特首,理所當然。但係如果選前江總真係去咗賣鹹鴨蛋,咁就可能會產生變數。傳聞佢下週會宣布辭去政務司一職,同時參加特首選舉,理應睇高一線。

冷門黑馬應屬葉劉。唔知大家仲記唔記得當年佢為咗強推23條激起民憤,搞到50萬人上街抗議,最後被逼洒淚辭別政壇,決定到美國深造學習民主之道。臨行曾應邀到北京見江總面授機宜。我哋梗係唔知佢哋講過乜,不過呢個舉動實在耐人尋味。

至於公民黨及民主黨提名嘅候選人,陪太子讀書而已,呢一點應該毫無疑問啦啩。聽講明年特首選舉團人數會增加一倍到1600人,相等於全港合資格選民嘅0.0003%,其中絕大多數係委任嘅愛國人士。親疏有別,泛民黨派想做特首,相信比駱駝穿針孔仲難囉。

最後一提,明年台灣咁蕎又係選舉年,候選人有國民黨馬英九同民進黨蔡英文,咁蕎兩個名都有『英』字,香港兩個熱門候選人名中亦有『英』字,台港四英相爭,各位玄學風水先進,請問其中有何玄機?

Post a comment or leave a trackback: Trackback URL.

迴響

  • 路人A  On 19/09/2011 at 8:47 上午

    冇一個啱聽…之不過我哋得個睇字🙂

    • Frank  On 19/09/2011 at 5:37 下午

      目前唔湯唔水嘅體制,肯蒲出來競選嘅唔會係叻人,真正嘅叻人就算當選特首也無從發揮。

  • samwong99  On 19/09/2011 at 2:44 下午

    其實香江根本冇資格獨立, 何能港人治港, 能保持現狀不大亂已是萬幸……

    • Frank  On 19/09/2011 at 5:32 下午

      老弟有所不明。獨立同自治係兩回事。相信香港人冇人會夢想獨立,但係一日達唔到完全自治,人民心中積累不滿情緒,遲早爆大鑊。

      • samwong99  On 20/09/2011 at 11:27 上午

        我講既獨立即係自治..
        真係獨立即刻幾十個過江龍過泥插旗,架頭打賓佬, 禿鷹鬥灰熊~~
        真係自治.即刻南北戰, 共產打民國, 癲狗咬煲呔….果陣真係香江浸蛟龍.
        呵呵呵

    • Frank  On 20/09/2011 at 10:29 下午

      請恕愚兄才疏學淺,未能領略老弟意思,故無從置喙。敬請原宥。

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s

%d 位部落客按了讚: