香港俗語溯源

放飛機
何謂放飛機?話說當年香港有史以來第一次有飛機嚟表演,仲要部水上飛機添,全香港萬眾期待。到咗個日,因為打風飛機唔飛得,眾人失望而歸。到第二日,天朗氣清,各人以為有得睇啦啩,點知個飛機師病鬼咗,要推到第三日。而到咗第三日,到部飛機個引擎出事,修理唔到。跟住就棚尾拉箱喇,卒之睇唔到。所以啲人就用『放飛機』形容話咗去做又冇做到嘅行為。
 
炒魷魚
以前喺鋪頭打工一般都包食包住,打工仔只有帶一張被同埋衫褲日用品就可以上工。若果老板唔滿意佢嘅表現或者任何原因就可以解僱佢,呢個可憐嘅打工仔就要捲埋被鋪走人。捲埋咗嘅被鋪好似炒熟咗嘅魷魚咁捲埋一嚿,所以被老板解僱就叫做『炒魷魚』。
 
食無情雞
以前中國人老細多數刻薄夥記,平時多數食啲青菜豆腐,冇乜肉食。但係每逢初一、十六做『牙』,例牌加餸,『大雞、牛白腩』已經係非常美味。到咗年尾嘅『尾牙』(農曆十二月十六)食飯個陣,若果老細想解僱邊個夥記但又唔好意思直接開口,就特別夾一塊雞俾佢。個夥記一見到老板請佢食呢件『無情雞』,就心中有數,當晚即刻執埋包袱,向老板請辭歸故里去也。
 
巴閉
『巴閉』來自印度話,自漢朝中國己同印度人做生意, 啲印度商人周不時鬼殺咁嘈,成日係度嗌:『BAP RE, BAP RE!』,意思係『我的天呀!』,於是廣東人就學佢地講,講下講下就變成今日『巴閉』喇!
 
混吉
原來係因為以前既小型飯店,只要你去幫襯就會免費奉送一碗清湯,飯店每日所售雞鴨鵝豬牛肉,都用呢一鍋水整熟既,所以湯入面有啲肉味,然後落一堆味精,就係一碗清湯啦!因為係清湯,所以入面乜料都無,即係空空如也,香港人覺得『空』等於『兇』,所以就改成『吉』,所以碗湯就叫做『吉水』。當時,有好多窮人,入到飯店,一坐低,夥記就摞一碗『吉水』,啲窮人一口氣飲完,靜雞雞就走咗去,因為呢碗湯係免費,所以飯店唔可以話佢白食,所以夥記就叫呢種混騙行為叫做『混吉』
 
杯葛
其實『杯葛』是英文BOYCOTT的譯音,意思即係『反抗和抵制』,唔講唔知,BOYCOTT原來係一個人名,全名叫做 Charles Cunningham Boycott, 生於1832年,死於1897年,係北愛爾蘭一個惡漢,專替貴族大地主等收租,手段兇殘,專逼害那些窮困的佃戶,一遇到錢交租,就會諸多逼害。於是,呢班佃戶一呼百應,聯合起來對付逼害者。杯葛打唔過佢地,惟有落荒而逃,自始面目無光,備受困擾痛苦而死。愛爾蘭佃戶今次打勝仗,轟動一時,影響很大。此後但凡抵製或斷絕關係,成為政治經濟鬥爭手段,就以此位愛爾蘭收租佬的姓為名,叫做『杯葛』也。
 
大耳窿
原來開埠初期,香港華人、洋人、印度人雜處,而放貴利的多數係戴白頭巾嘅印度人,所以人人都叫地做『白頭摩囉』。白頭摩羅扮相古怪,中意戴一隻大如銅元的耳環,所以耳朵要穿個耳洞,港人覺得可憎,稱他們為『大耳窿』。不過,還有一個說法,當時放貴利,都是放小額款項如三幾角錢,給勞苦大眾,為使人們知到他們有錢借,便把一個銀元塞在耳朵的耳窿,作為記號,令人認得。
 
一蚊雞
原來我哋所講『一蚊雞』同塘西風月有關。話說以前去塘西召妓,初步手續先寫一張『花紙』,而格式亦有規定,先寫自己名號(以幾多自稱),中間寫妓女名字,最後一行寫妓院名稱。寫好之後,便交由酒樓雜役帶去妓院,那些阿姑接到『花紙』,便應召『出局』。妓女每次局票收一元,而省港人士向來稱妓女為『雞』,既然一元召得一『雞』,後來就索性稱一元做『一蚊雞』。順帶一提,這一元只是陪酒談笑而已,屬『體面上』的手續,如果飲客要有更進一步的行動,仲要花很多、很多錢吖。
 
十三點
『十三點』是上海市井俚語,因為解放之後大量上海人南移,才變成趣怪廣州話。『十三點』初時意謂『敲亂鐘』,原來舊時的時鐘,每逢一小時便報時一次,例如下午四時,鐘擺便會敲響四下,五點敲五下,至多係十二點,也不過敲十二下,但居然敲出十三響,唔通有十三點?當然係出問題,正如俗語所講癲癲地!所以,十三點就係代表人既性格癲癲地。
 
丫嗚
有好長一段時間,廣東人已遺忘『丫嗚』這俗語,不過,大約是一九八五年林子祥所唱的《丫嗚婆》,使『丫嗚』重新流行了一陣子。『丫嗚婆』,指醜怪女人,因為『丫嗚』本身已經係怪物,而『丫嗚婆』當然係好極有限。其實『丫嗚』呢個名稱嘅來源係指漢朝個大將軍叫做劉胡。因為皮膚黝黑,所以叫呢個將軍做『黝胡』。當時廣東一帶嘅南蠻人非常害怕大將軍之威名,每遇小兒扭計哭啼,就索性拿這個惡人來嚇孩子們:『劉胡來啦!』 『黝胡來啦!』、『丫胡婆來啦』…『丫胡公來啦!』。由此可見,『丫嗚』不算係甚麼怪物,只是個貌醜的黑炭頭將軍,後來才渲染成為鬼怪!
 
捉黃腳雞
原來呢個搞笑俗語係出自廣東的農村,農民養雞,專養雞乸而唔中意養雄雞,因為雞乸可以生蛋,所以價錢不錯。所以如果要拜神,當然劏雄雞啦。點捉雄雞?農民先將穀撒在門外,雞乸就會『雞咁腳』走嚟食穀,當班雌雞食緊穀嘅時候,班雄雞就色心大起,懶得去食穀,一撲就擒上雞乸背上進行交配….呢個時候,正係捉雄雞的最好時候,那班色中餓鬼當時並無防範,農民一手捉住佢哋嘅的腳就掂曬。點解叫黃腳雞?原來雄雞腳多數呈深蛋黃色。
 
飛仔,飛女
戰後上海好多後生仔時尚模仿美國荷里活明星裝扮,中意將頭髪吹一個波向前突出狀似飛機。呢啲前衛嘅後生仔多數不思上進唔番學,又食煙飲酒,不務正業。上海人叫佢哋做『飛機頭』,簡稱『阿飛』。解放後,大批上海人遷居香港,一樣叫啲不務正業嘅後生仔做阿飛。廣東人又將佢發揚光大,叫男仔做『飛仔』,女仔做『飛女』。
 

 
Post a comment or leave a trackback: Trackback URL.

迴響

  • 路人  On 01/07/2009 at 9:26 下午

    哈哈

  • 路人  On 01/07/2009 at 9:27 下午

    一蚊雞…OQ happy 咯

  • 米米  On 01/07/2009 at 9:57 下午

    原來如此…

  • 瑞克  On 01/07/2009 at 10:16 下午

    真係香港人先會識!

  • Sam  On 02/07/2009 at 12:17 下午

    Dr ~ 大家 Happy …呵呵呵

  • lady  On 02/07/2009 at 5:28 下午

    有趣…..有d我都唔識解

  •  On 02/07/2009 at 6:21 下午

    咁又真識多好多嘢….唔該晒, 多謝晒….

  • LIZA  On 03/07/2009 at 8:54 上午

    早呀 ~ 清楚哂,唔駛烏SIR SIR 喇 :D

  • deby  On 03/07/2009 at 11:03 上午

    好好的教學,知多D,唔使十下十下。

  • Maggie  On 03/07/2009 at 1:32 下午

    真係吾講吾知喎~

  • Sam  On 03/07/2009 at 2:30 下午

    午安~

  • 淑敏  On 03/07/2009 at 11:03 下午

    哦…….原來係咁解……晚安 ^^

  • Sam  On 04/07/2009 at 10:41 上午

    早 Good Morning 晨~

  • lady  On 04/07/2009 at 9:50 下午

    謝過宗兄先, 宗妹無事, 巴士剎車都唔係太急…….被花哂式玻離嚇親姐

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s

%d 位部落客按了讚: