長者生果金

港英時代，香港政府推出咗長者生果金作為對老人家一生辛勞為香港社會作出貢献嘅敬意，獲得一致好評。只要夠六十五嵗就有資格申請，不過要審查資產。過咗七十嵗就不論貧富，每月一律發放港幣六百零蚊，即係平均每日卄零蚊。呢啲錢雖然濕濕碎，但十幾年前，都夠買幾款水果食，所以香港嘅長者都食得好健康，無形中幫政府慳番唔少醫療開支，令香港人嘅平均壽命排喺世界排名前列。由於近年通脹驚人，老人家喊唔夠，深得社會各界人士同情，最近好多團體要求港府將長者生果金提高至每月一千蚊，港府遲遲冇回應。

 

日前當奴曾特首喺立法會施政報告答問會提到呢件事，佢認為要求生果金加碼，咁咩即係話生果金嘅性質已經改變為一種生活津貼？所以必須好似申請綜援咁引入審查制度。即係話就算年過七十，若果有資產就唔合資格領取。此言一出，不論左、中、右派嘅議員情緒高漲，群起質問，搞到當奴面黑黑，話要成立委員會深入研究，稍後公佈詳情云云。其實使乜研究吖，一於一刀切全部取消就啱。原因何在？等我同大家分析下：

 

一、金融海嘯嘅後遺症好快見到，今後三到五年香港唔慌有好日子過。預見港府就要入不敷支，應慳則慳。取消生果金，每年可慳幾億銀，幫補赤字。

 

二、若果當奴自詡強勢領導，一意孤行，監硬引入資產審查制度，可能會有好多老人家嗱嗱淋將僅有嘅棺材本全部轉名俾仔女以取得綜援資格，港府嘅負擔重勁，弄巧反拙。亦因此可能搞出好多倫常惨劇，當奴於心何忍？全部取消咩唔會出現咁嘅問題囉。

 

三、就算肯定要作資產審查，應該按資產多寡嘅比例派。資產少嘅比較慳家，唔使俾咁多已經足夠。資產多嘅食慣高級生果，價錢昂貴，港府應該資助多啲。若果唔係咁，不如取消罷就。

 

四、當奴話由於香港人口急劇老化，25年後每四個人就有一個長者，社會負擔沉重。取消生果金制度，可以令長者唔好咁長命，阻住地球轉；25年後每十個人有一個長者就啱數。若果咁都未夠，索性學日本電影「楢山節孝」裡邊嘅情節咁，將所有老人抬去港外一個荒島，由得佢哋自生自滅。港府笑笑口拍拍手，社會上一個長者都冇咁就冇晒負擔，舒服晒！