人生插曲

以下是近日發生嘅真事：

 

電車惡客

上禮拜六下午三點左右，我搭電車返屋企。到站落車，正想向前行去出口，突然見到樓上乒鈴乓唥有一對中年男女衝落來，我以為佢地都係落車，咩懶紳士風度咁等佢地行先。點知佢地兩個唔係落車，戙篤企喺度塞住門口。我當時有啲激氣，不過都好有禮貌咁話：“唔該借借，我要落車。”個男人瞪大隻眼望住我：“超，落車又唔早啲出嚟…”。喺咁嘅情況下，我冇同佢解釋亦唔想同佢嘈，只係急急腳落車走人，不過當時條氣就真係好剒。各位網友，若果係你，點樣反應？

電話借錢

有個一向冇乜來往嘅舊同事突然打電話來同我敘舊。佢話啱啱賣咗觀塘間屋，還清晒銀行按揭，就快搬來北角住。我話好呀，咁近我屋企到時探你啦。跟住佢又話依家手頭現金唔夠，問我可唔可以借住三萬蚊畀佢週轉，佢寫返張三個月嘅期票畀我到時保證兌現。我當時冇諗到佢會同我借錢，當堂打個突唔出聲。佢見我冇回應，又話若果唔方便，咁借住萬零銀得啩？我唯有同佢講明我唔同朋友借錢亦唔借錢畀朋友嘅原則。佢顯然唔係好啹，跟住收線。若果你係我，會唔會借錢畀佢？

問路借錢

上星期日喺跑馬地打完波去車站準備搭車返屋企。有個廿零歲、衣著入時嘅靚女行埋嚟，用帶住好濃厚北方口音嘅廣東話問我山村道點行。我懶醒咁用普通話指點佢點樣去，佢猛咁讚我嘅普通話講得好地道，問我係唔係北方人，又問我幾時來香港。我見佢談吐溫文好有禮貌，咩同佢搭訕幾句囉。講講下，佢突然話出嚟唔記得帶銀包，問我方唔方便借住幾十蚊畀佢搭車。吓，我如夢初醒原來係呢家嘢，答都唔答佢，即刻話我架車到，失陪晒。嗱嗱聲走上車，重驚死佢跟埋嚟，咁就唔知點算好。好彩佢冇諗到我行動咁敏捷，企係度戇居居冇晒反應。奉勸各位男士，就算撞到靚女，都要時時保持頭腦清醒。一見到勢色唔對，識得學我有咁快，撇咁快。