特區無間道

前香港保安局長葉劉淑儀三年前劈炮飛去美國深造專攻政治學,日前回港發表咗佢有關特區民主政制發展嘅碩士論文。浸過鹹水做咗“海歸”嘅掃把頭,靈舍唔同,唔止髮型改變咗,其民主言論更令全港有心人士刮目相看。諗唔到當年董建華時代強推基本法23條以箝制言論,鎮壓民權嘅悍將,依家搖身一變成為民主戰士。佢嘅民主言論雖然類似民主派嘅主張,唔知點解居然使到香港愛國人士拍手叫好。搞到我懵盛盛都唔知發生緊乜事。
 
回想當年佢為咗幫董建華硬銷23條,不惜放下身段,藐嘴藐舌,實行同大部份嘅港人對著幹,卒之好似大石跌落屎坑  -  激起公憤,搞到嗰年五十萬人喺回歸紀念日上街遊行抗議,轟動中外,震動北京。結果逼到老懵懂惟有棄車保帥,揮淚斬馬稷,勸喻佢自動辭職。但係佢嘅赤膽忠心,已經深得北京高層賞識,喺佢離港前專登請佢上京撫慰有加,面授機宜。
 
所以我話佢極有可能係中央埋下嘅伏子,用來對付民主派,以子之矛,攻子之盾。須知民主派之所以得到港人嘅擁護就得呢套西方民主言論,依家畀學成歸來葉劉騎劫咗,民主派惟有眼坦坦,冇聲出,連近日風頭甚勁的陳四萬都黯然失色。
 
不過世事冇絕對,葉劉亦有可能係民主派一早收買咗放喺董建華身邊嘅間諜。當年雖然民主派憎到老懵懂死,但係佢有江總照住,吹佢唔脹。難得葉劉願意犧牲色相,特登扮到有咁衰得咁衰,又倀雞又乞人憎,趕人上街。雖然自己做烈士,但係最後亦搞到老董腳痛請辭。依家得到中央信任,佢的民主論點又得到香港大部份市民認同,明年競選特首,十拿九穩。做左特首,即刻宣佈實行雙普選,一人一票直選特首同立法會,香港民主政制一步到位;到時民主黨、公民黨及所有泛民諸君笑到有牙冇眼,葉劉功不可沒。
 
之不過若果佢真係民主派嘅同路人,點解啲愛國維園阿伯之流又會咁中意佢?如果唔係,佢講嘢又咁似李柱明,湯大狀嘅?真係畀佢搞到頭都大晒。
 
到底佢係曾志偉插警隊支針,抑係黃秋生派去三合會臥底?究竟佢係梁朝偉抑係劉德華?撲朔迷離,好戲陸續來。現實生活仲好睇過超級大電影,做香港人真係幸福囉
 
Post a comment or leave a trackback: Trackback URL.

迴響

  • 簑笠翁  On 05/07/2006 at 11:30 上午

    宗兄:早晨!
     
    睇黎你中咗無間道戲毒。
     
    當年她預算錯誤以為可以博上位,
    被北大人眷顧,特首個位都有機會坐坐。
     
    而家又黎博…….懞…..人家唔記得。

  • 地球人  On 05/07/2006 at 11:52 上午

    morning ar….lam sir
    hehe…i am in space no commet for that or i cant have commet for that u know ga la….hehe

  • Frank  On 05/07/2006 at 12:04 下午

    翁老弟,地球人:遊戲文章,自娛娛人,不必太認真。
    翁老弟:擺明搏懵有點唧,大陸欽點就得喇,吹咩?

  • fan  On 05/07/2006 at 2:45 下午

    你無就唔出,一出就兩篇,我要慢慢消化先~

  • lady  On 05/07/2006 at 4:36 下午

    政治…….好悶, 係宗妹唔曉欣賞姐…..bye

  • Frank  On 05/07/2006 at 5:38 下午

    宗妹:乜你唔中意睇有關政治嘅題材咩?其實幾過癮架,有時仲好睇過啲大製作電影。咁你最中意乜嘢題材丫?
    Fan妹:你有咩意見呢?

發表迴響

在下方填入你的資料或按右方圖示以社群網站登入:

WordPress.com Logo

你正使用 WordPress.com 帳號留言。 登出 / 變更 )

Twitter picture

你正使用 Twitter 帳號留言。 登出 / 變更 )

Facebook照片

你正使用 Facebook 帳號留言。 登出 / 變更 )

Google+ photo

你正使用 Google+ 帳號留言。 登出 / 變更 )

連結到 %s

%d 位部落客按了讚: